క్లిష్ట పరిస్థితులను ఎదుర్కొన్నప్పుడు తన గురించి తాను మాత్రమే ఆలోచించకుండా తనలాంటి వారందరి గురించీ ఆలోచించి, చర్య తీసుకునేవారు అత్యంత అరుదుగా కనిపిస్తారు. అందులో ఈ తరం యువత నుంచి దాన్ని మనం ఆశించలేమన్న భావన సమాజంలో నెలకొన్నదన్నది వాస్తవం. కానీ, అలాంటివారు కూడా ఉంటారని రితేష్ అగర్వాల్ వంటి యువకులు ఆచరణాత్మకంగా నిరూపించారు. మధ్య తరగతి పర్యాటకులకు అందుబాటులో ఉండేలా 18 ఏళ్ల వయసులోనే అతడు ప్రారంభించిన ‘ఓయో’ వసతి సేవలు ఇప్పుడు ప్రపంచవ్యాప్తంగా మన్ననలు అందుకుంటున్నాయి.
బడ్జెట్ హోటల్ విభాగంలో ఒక లోటును గమనించినప్పుడు రితేష్ ఆతిథ్యరంగ ప్రయాణం ప్రారంభమైంది. భారతదేశంలో పర్యాటక రంగం అభివృద్ధి చెందుతున్నప్పటికీ, బడ్జెట్ హోటళ్లలో ప్రామాణీకరణ కొరవడటంతో వినియోగదారులకు అస్థిరమైన అనుభవాలు ఎదురుకావడాన్ని అతడు గమనించాడు. ఈ పరిశీలనే 2013లో ఓయో రూమ్స్ అనే ఆలోచనకు దారితీసింది. ఇది ప్రయా ణికులకు ప్రామాణికమైన, సరసమైన ధరలలో గదులను అందించడానికి హోటళ్లతో భాగస్వామ్యం కుదుర్చుకున్న ఒక వేదిక.
అతను మొదట బడ్జెట్ హోటళ్ల కోసం ఓరవెల్ స్టేస్ అనే వేదికను ప్రారంభించాడు. అది విజయ వంతం కాలేదు. అయినా నిరాశ చెందకుండా, రితేష్ తన వ్యాపార నమూనాని మార్చి, దానినే ఓయో రూమ్స్గా మార్పు చేశాడు. 2013లో, వర్ధమాన పారిశ్రామికవేత్తలకు పీటర్ థీల్ అందించే 100,000 డాలర్ల గ్రాంటు అయిన ప్రతిష్టాత్మక థీల్ ఫెలోషిప్ను అందుకున్న మొదటి భారతీయుడిగా ఆయన నిలిచారు.
ఓయో వ్యాపార నమూనా సరళమైనప్పటికీ ప్రభావవంతమైనది. అతడు హోటళ్లతో భాగస్వామ్యం కుదుర్చుకుని, వారి సేవలను మెరుగుపరిచి, ఓయో పేరుతో బ్రాండింగ్ చేశాడు. ఈ సంస్థ వివిధ ధరల శ్రేణులలో నమ్మకమైన, ప్రామాణికమైన బసను అందించడంపై దృష్టి సారించింది, దీనివల్ల ఇది బడ్జెట్ ప్రయాణికులలో విజయవంతమైంది.
ఓయో కేవలం గదులకే పరిమితం కాకుండా, భారతదేశ హోటల్ పరిశ్రమలో అతి త్వరలోనే అందరికీ తెలిసిన పేరుగా మారింది. ఈ బ్రాండ్ చైనా, అమెరికా, యూకే సహా అనేక ఆగ్నేయాసియా దేశాలలో తన ఉనికిని చాటుకుంటూ అంతర్జాతీ యంగా విస్తరించింది. 2019 నాటికి, ఓయో విలువ 10 బిలియన్ డాలర్లకు పైగా చేరింది. దీనితో రితేష్ ప్రపంచంలోనే అత్యంత పిన్న వయస్కుడైన బిలియనీర్లలో ఒకరిగా నిలిచారు.
ఆతిథ్య రంగంలోని సమస్యలను గుర్తించి, పరిష్కరించగల సామర్థ్యమే ఓయో విజయానికి మూలం. సులభంగా ఉపయోగించగల బుకింగ్ వ్యవస్థ నుండి నాణ్యతను కాపాడుకోవడం వరకు, ఈ బ్రాండ్ బడ్జెట్ వసతుల పట్ల ఉన్న దృక్పథాన్ని విప్లవాత్మకంగా మార్చింది. ఇదే అతడిని భారతదేశపు అతిపెద్ద హోటల్ నెట్వర్క్కు, ప్రపంచంలోని మూడవ అతిపెద్ద వసతి గదుల నెట్వర్క్ బ్రాండ్కు వ్యవస్థాపకుడిగా ఎదిగేలా చేసింది.
అన్ని నూతన వ్యాపారాలలానే ఓయో కూడా తొలి సంవత్సరాలలో ఎన్నో ఒడుదొడుకులను చవిచూసింది. భారతదేశంలోని బడ్జెట్ హోటళ్లు, హాస్టళ్లను ఏకీకృతం చేయడం ద్వారా ప్రారంభమైన ఈ వ్యవస్థ, శుభ్రమైన పరుపులు, దుప్పట్లు, స్నానానికి వేడి నీటి సౌకర్యం, ఉచిత వైఫై వంటి కనీస ప్రమాణాలను వినియోగదారులకు అందించేలా చూసుకుంది. తక్కువ లాభాల నమూనాపై బ్రాండ్ను నిర్మించడానికి సంస్థ అధిక ధనాన్ని ఖర్చు చేస్తోందని, కనుక, ఇది నిలకడైన వ్యాపారంగా కొనసాగలేదని మొదట్లో విమర్శకులు అభిప్రాయపడ్డారు.
భారతదేశంలో బలమైన పునాది వేసుకున్న తర్వాత, సంస్థ తన ఆగ్నేయాసియా ప్రణాళికను సంస్థ ప్రారంభించింది. కొన్నేళ్ల్ల క్రితం మలేషియాలో ప్రారంభమైన ఈ సంస్థ, ఆ సమయంలో తన విస్తరణ ప్రణాళికలో అనేక మార్పులు చేయాల్సి వచ్చింది. మలేషియాలో తనకు చాలా సాయం లభించడంతో విజయం సాధించి, తర్వాత నేపాల్కు, తర్వాత చైనాకు విస్తరించినట్టు రితేష్ వివరించాడు.
ఆ సమయంలోనే సంస్థ పాక్షికంగా లేదా పూర్తిగా హోటళ్లను లీజుకు తీసుకోవడం, నిర్వహించడం వంటి రంగాలలోకి విస్తరించింది. తమ నెట్వర్క్లో 10,000కు పైగా ఫ్రాంచైజ్ లేదా లీజుకు తీసుకున్న హోటళ్లు ఉన్నాయని, ఇవి ఐదు దేశాల్లోని 350 నగరాల్లో విస్తరించి ఉన్నాయని సంస్థ పేర్కొంది.
ఈ క్రమంలోనే ఉద్యోగులకు శిక్షణ ఇవ్వడానికి కూడా పెట్టుబడి పెట్టాల్సిన అవసరం ఏర్పడింది. ప్రస్తుతం భారతదేశంలో 26, చైనాలో ఆరు శిక్షణ సంస్థలను ఓయో నడుపుతోంది. గదుల నిర్వహణ కోసం ఇంజినీర్లను, ఓయో కెప్టెన్స్ అని పిలిచే వేలాదిమంది జనరల్ మేనేజర్లను కూడా నియమించుకుంది. వ్యాపారంలోని భౌతిక అంశంలో తాము పెట్టిన ఈ పెట్టుబడుల కారణంగానే, ఆస్తుల యజమానులు ఓయో పట్ల సానుకూల అభిప్రాయంతో ఉన్నారని రితేష్ అంటాడు.
దిగువ మధ్య తరగతి కుటుంబంలో జన్మించిన రితేష్ తండ్రి, అతడు మంచి జీతంతో ఉద్యోగం తెచ్చుకోవడమే పెద్ద లక్ష్యం సాధించడమని భావించే వాడు. రితేష్ 1993లో ఒడిషాలోని బిస్సాం కటక్లో ఒక మధ్య తరగతి మార్వాడీ కుటుంబంలో జన్మించాడు. అతడి పాఠశాల విద్య రాయగడలోని టిట్లాగడ్లో కొనసాగింది. అతడికి సాంకేతికత పట్ల ఉన్న ఆసక్తి కారణంగా పాఠశాలలో ఉన్నప్పటి నుంచే కోడింగ్ చేయడం ప్రారంభించాడు. కేవలం 17 ఏళ్ల వయసులోనే ఐఐటీలో చేరిన అతడు, తన వ్యవస్థాపకతా లక్ష్యాలను సాధించేందుకు కొద్ది కాలంలోనే చదువు మానేశాడు. అతడు ఆ పని చేసిన కారణంగానే నేడు దేశంలోనే అతిపెద్ద ఆతిథ్య పరిశ్రమ గొలుసు ఓయో రూమ్స్ సాధ్యమైంది. దార్శనికత, నూతన ఆవిష్కరణలు, పట్టుదల అసాధారణ విజయాలకు దారితీస్తాయని రితేష్ అగర్వాల్ కథ నిరూపిస్తుంది. నేడు అతడు ఔత్సాహిక పారిశ్రామికవేత్తలకు స్ఫూర్తిగా నిలవడమే కాదు, అనేకమందికి ఉపాధిని కల్పించడం ద్వారా దేశ ప్రగతికి తోడ్పడుతున్నాడు.
– జాగృతి డెస్క్
About Author
