ఆర్థిక భరోసా తెలుసుకోవాలి!

ఆర్థిక భరోసా తెలుసుకోవాలి!

కుటుంబంలో ఇంటి ఇల్లాలి పాత్రను వేరెవరూ భర్తీ చేయలేరు. ఆ కుటుంబంలో అనుకోకుండా జరగరానిది జరిగితే ఆ ఇంటి ఇల్లాలు ఎంతగానో సతమతం అవుతుంది. ముఖ్యంగా ఇంటి పెద్దపై ఆధారపడిన ఇల్లాలి పరిస్థితి మరింత ఇబ్బందికరం. మనం మంచి కోరుకోవాలి కానీ కాలం ఎప్పుడూ ఒకరీతిలోనే గడుస్తుంది అనుకోవడం అవివేకమే. అందుకే మన పెద్దలు కీడెంచి మేలెంచాలి అని అన్నారు. కుటుంబ పెద్దకి ఏమైనా జరిగినప్పుడు ఆ ఇంటి ఇల్లాలిని ఆర్థిక సమస్యలు చుట్టుముడతాయి. పిల్లల విద్య, వివాహ బాధ్యతలు, రుణాలు చెల్లించడం, ఇలాంటివన్నీ ఇల్లాలి మీదే పడతాయి. అందుకే రాకూడని ఆ పరిస్థితులు ఒకవేళ వస్తే ఎదుర్కునేందుకు వీలుగా గృహిణి తయారుగా ఉండాలి.

సాధారణంగా కుటుంబానికి ఆధారంగా ఉన్న ప్రతీ భర్త తన కుటుంబం కోసం కొన్ని రకాల ముందు జాగ్రత్తలు తీసుకుంటాడు. కానీ ఇల్లాలికి చెప్పచ్చు, చెప్పకపోవచ్చు కూడా. అందుకే ఇంటి ఇల్లాలు సైతం ఈ విషయంలో అవగాహనతో ఉండాలి. భర్త మరిచినా, అలక్ష్యం చేసినా తనే శ్రద్ధ తీసుకుని తన కుటుంబానికి ఆర్థిక భరోసా కల్పించాలి. ఆర్థిక భరోసాకు వీలుగా భద్రమైన భవిష్యత్తుకు కొన్ని నిర్ణయాలు తీసుకోవాలని భర్తను ముందుగానే కోరాలి. అందుకోసం కుటుంబానికి ఆధారంగా ఉన్న వారు, భర్త స్థానంలో ఉన్న వారు కూడా ముందు చూపుతో ఆలోచించి తగిన నిర్ణయాలు తీసుకోవాలి అవి ఇంతులకు తెలియజేయాలి. అందుకు ఏం చేయాలన్నది చూద్దాం.

పెట్టుబడుల గురించి తెలియాలి

భర్త చేసే అన్ని రకాల పెట్టుబడుల గురించి భార్యకూ తెలియడం ఎంతో అవసరం. స్టాక్‌ మార్కెట్లో పెట్టుబడులు కానీయండి, మ్యూచువల్‌ ఫండ్స్‌, ఫిక్స్‌డ్‌ డిపాజిట్లు ఇలాంటివన్నీ. మహిళ సైతం ఈ పెట్టుబడి సాధనాల గురించి, వాటి రాబడులు, ఇతర విషయాల గురించి పూర్తిగా అర్థం చేసుకోవడం కూడా తప్పనిసరి. దీనివల్ల భర్త దూరమైతే ఆయా ఆర్థిక విషయాలు, పెట్టుబడుల సాధనాల నిర్వహణను ఆమె తేలిగ్గా నిర్వహించ గలుగుతుంది. కొన్ని విషయాలు అంత తేలిగ్గా అర్థం కావు. కొన్ని స్టాక్‌ మార్కెట్‌లకు సంబంధించిన విషయాలు నాకు అర్థం కావని మహిళ తప్పించు కుంటే అది తప్పే. ప్రతీదీ అర్థం చేసుకుంటూ ఉంటే కొంత కాలమైనా సరే దాని గురించి మొత్తం తెలుస్తుంది. అంతే తప్ప నాకీ విషయాలేవీ అర్థం కావని వదిలేయవద్దు. రేపు ఏమైనా జరిగితే ఇప్పుడు నేర్చుకున్న ఆ కాస్త ఆర్థిక పరిజ్ఞానమే ఉపయోగ పడవచ్చు. అందుకోసం భర్త చెప్పినా చెప్పకున్నా తానే చొరవతీసుకుని నేర్చుకోవాలి.

నామినీగా పేరు రాయించుకోండి

చాలామంది ఏమవుతుందిలే అని నామినీ కాలమ్‌లో ఏదీ రాయకుండా వదిలేస్తుంటారు. అది తప్పు. కుటుంబ పోషణ చేస్తున్నవారు అన్నిరకాల పెట్టుబడి సాధనాలకు, బీమా పాలసీలలో నామినీగా భార్య పేరు రాయించాలి.

బ్యాంకు ఖాతాలు, ఈక్విటీ లింక్డ్‌ సేవింగ్స్‌ స్కీమ్‌ పథకాల్లో, ఫిక్స్‌డ్‌ డిపాజిట్లలో ఇలా అన్నింటిలోనూ నామినీ పేరు పేర్కొనడం అవసరం. ఉదాహరణకు ఫిక్స్‌డ్‌ డిపాజిట్‌లో నామినీ పేరును ఇవ్వకుంటే డిపాజిట్‌ దారుడు కాలం చేశారనుకోండి.. అప్పుడు చట్టబద్ధమైన వారసులు అన్న ధ్రువీకరణను అందజేయాల్సి వస్తుంది. ఇది కాస్త ఇబ్బంది కలిగించేదే. అలా కాకుండా భార్య పేరు రాసినట్లయితే ఆ సొమ్ము భార్యకు అందజేస్తారు. అందుకు మీ పేరును రాయించుకోండి. అలాగే భార్యా భర్తలు ఇద్దరూ జాయింట్‌ బ్యాంకు ఖాతాను నిర్వహించడం ఎంతో అవసరం. ప్రతీ ఇల్లాలూ జాయింటు ఖాతా తెరుద్దామని తన భర్తను కోరాలి. జాయింటు అకౌంట్‌ వల్ల ఎన్నో ప్రయోజనాలు ఉన్నాయి. అన్ని రకాల ఖర్చులను పరిశీలించే అవకాశంతోపాటు ఇద్దరూ ఖాతాను నిర్వహించుకునే స్వేచ్ఛ ఉంటుంది. ఒకవేళ ఒకరు మరణిస్తే ఖాతాపై హక్కులు వేరొకరికి సులభంగా బదిలీ అవుతాయి. అయితే, జాయింట్‌ ఖాతాల్లోనూ చాలా రకా లున్నాయి. అందులో ఐదర్‌ ఆర్‌ సర్వైవర్‌ అన్న జాయింట్‌ ఖాతా భార్యాభర్తలకు అనుకూలంగా ఉంటుంది.

బీమా పాలసీలు

ఎన్ని జాగ్రత్తలు తీసుకున్నా రకరకాల వ్యాధులు మనుషులను చుట్టుముట్టుతున్నాయి. వాటి చికిత్సకోసం అయ్యే ఖర్చు కూడా తడిసి మోపడు అవుతుంది. కనుక ప్రతీ కుటుంబానికి ఆరోగ్య బీమా అన్నది చాలా అవసరం. వైద్య బీమా లేకపోతే కుటుంబానికి ఆధారమైన వ్యక్తి తీవ్ర అనారోగ్యం పాలైతే, ప్రమాదంలో తీవ్ర గాయాలతో ఆస్పత్రిలో చేరితే ఆ కుటుంబం పొదుపు మొత్తం హరించుకు పోయే పరిస్థితి ఉంది. అందుకే తగినంత కవరేజీతో వైద్య బీమా ఉంటే పొదుపు ఖర్చయిపోకుండా ఉంటుంది. వైద్య బీమా ఉంటే నగదు రహిత చికిత్సలను ప్రీ, పోస్ట్‌ హాస్పిటలైజేషన్‌ ఖర్చులను బీమా సంస్థే భరిస్తుంది.

కుటుంబానికి ఏకైక ఆధారంగా ఉన్న వ్యక్తి హఠాత్తుగా మరణిస్తే పరిస్థితి ఏంటో ఒక్కసారి ఆలోచించండి. ఆ వ్యక్తి పిల్లల్ని ఎవరు చూసు కుంటారు, వారి విద్య, వివాహాలు, పోషణ వ్యవహా రాల బాధ్యతలు ఎవరిపై పడతాయి? ఇల్లాలే ఇవన్నీ చూసుకోవాలి. ఇల్లాలు కూడా ఆర్జనాపరురాలైతే ఫర్వాలేదు. ఒకవేళ గృహిణిగా ఉంటే పైన చెప్పుకున్న బాధ్యతలన్నీ పెద్ద బరువుగా మారతాయి. అందుకే తాను లేకపోయినా తన కుటుంబం ఆర్థికంగా సమస్యల్లో చిక్కుకుపోకుండా టర్మ్‌ ఇన్సూరెన్స్‌ పాలసీ తీసుకోవాలి. ఇవి తీసుకోవాలని ఇల్లాలు సైతం తన భర్తకు సూచించాలి. అప్పుడే ఆ కుటుంబానికి రక్షణ లభిస్తుంది. టర్మ్‌ పాలసీ అంటే కట్టిన ప్రీమియంలను వెనక్కి ఇచ్చేది కాదు. తక్కువ ప్రీమియంతో ఎక్కువ కవరేజీ లభిస్తుంది. పిల్లల విద్య ఆగిపోకుండా ఉండేందుకు చైల్డ్‌ ఇన్సూరెన్స్‌ పాలసీలు తీసుకుంటే రక్షణగా నిలుస్తాయి. ఈ పాలసీలు క్రమానుగతంగా పాలసీలో పేర్కొన్న మేరకు చెల్లింపులు చేస్తాయి. పైగా భవిష్యత్తు ప్రీమియాల చెల్లింపులు సైతం రద్దవుతాయి. పాలసీ పిల్లల విద్య పూర్తయ్యే వరకూ లేదా పాలసీ కాల వ్యవధి వరకు కొనసాగుతుంది. అందుకే పిల్లల పేరిట పాలసీ తీసుకోవాలని ప్రతీ గృహిణి తన భర్తను కోరడం ఎంతో మంచిది.

ఉమ్మడి నిర్ణయం మేలు

సాధారణంగా ఖర్చు విషయంలో భార్యలు సంప్రదాయంగానే ఉంటారు. కానీ పురుషులు దూకుడుగా ఉంటారు. ఇదే తీరు పెట్టుబడులకు పనికిరాదు. పెట్టుబడుల విషయలో ఆలోచన అవసరం. ఆచితూచి నిర్ణయం తీసుకోవాలి. ఇందుకు భార్య ఆలోచన ఉపయోగపడవచ్చు. దాంతో తొందరపాటు పెట్టుబడులకు బ్రేక్‌ పడుతుంది. ఇద్దరూ కలసి పెట్టుబడులపై నిర్ణయం తీసుకోవడం అన్ని విధాలా మేలు.

పెట్టుబడులకు సంబంధించిన అన్ని రకాల డాక్యుమెంట్లు, అలాగే ఆస్తులు, రుణాలకు సంబంధించిన అన్ని డాక్యుమెంట్ల గురించి ఇంటి ఇల్లాలు తప్పకుండా తెలుసుకోవాలి. లేదంటే భర్త మరణం సందర్భంలో అవి లభించకుంటే భారీగా నష్టపోవాల్సి వస్తుంది. కీలకమైన డాక్యుమెంట్లు అన్నింటినీ ఓ ర్యాక్‌లో పెట్టడం మంచిది.

పాస్‌వర్డ్‌లు

ఇవి చాలా సున్నితమైనవి. చాలా కీలకమైనవి. పడరాని వారి చేతిలో పడితే పెద్ద నష్టమే కలుగుతుంది. కానీ భార్యా భర్తల విషయంలో ఇటువంటి సందేహాలు అక్కర్లేదు. పెట్టుబడులు ఎలక్ట్రానిక్‌ రూపంలో ఉన్నప్పుడు పాస్‌వర్డ్‌లు ఎంతో ఉపయోగపడతాయి. షేర్లు, మ్యూచువల్‌ ఫండ్స్‌ వంటివి.. భార్యా భర్తల మధ్య ఆర్థిక విషయాల్లో దాపరికం లేకుండా అన్నింటి గురించి సమగ్రంగా పంచుకోవాలి. వీటి గురించి ప్రతి ఒక్కరు చొరవతీసుకుని మరీ భర్తను అడగాలి.

Leave a Reply

Your email address will not be published. Required fields are marked *